–Þá byrjar það, sagði Kristie og stakk höfðinu inn í herbergi frænku sinnar. –Hvað byrjar? spurði Jess og lauk við fléttuna og setti rauða prjónahúfu yfir ljóst hárið. Hún tók upp sólgleraugun sín og skíðahanskana áður en hún elti frænku sína út úr fimm stjörnu íbúð fjölskyldu þeirra. –Aðgerðin. Að finna kærasta handa Jess, sagði Kristie. –Ha? Af hverju? –Af því að þú ert að verða átján ára og þú veist ekki hverju þú hefur misst af. Það er kominn tími til að finna gullfallegan strák handa þér. Strák sem þú stenst ekki, einhvern sem getur kysst sér leið inn í fílabeinsturninn þinn og sópað undan þér fótunum. Við höfum talað um þetta. Þær höfðu gert það en Kristie var alltaf að tala um stráka á einn eða annan hátt og Jess hunsaði hana að mestu leyti. Kristie var vitlaus í stráka... hún varð ástfangin á svona tveggja vikna fresti... en Jess var öðruvísi. Flestir strákar sem Jess hitti virtust vera óþroskaðir og kjánalegir. Hún skildi ekki hvaða læti þetta voru. Sautján og átján ára strákar voru einmitt það. Strákar. Og Jess vildi draumaprins. Draumaprinsinn kæmi þegar hann kæmi. Hún efaðist um að Kristie gæti kallað hann fram. –Ég held að þú sért að gleyma nokkru, sagði Jess þegar þær létu skíðin falla á snjóinn og festu við klossana, tilbúnar að takast á við fyrsta skíðadaginn í Moose River Alpine Resort.

Eignastu þessa bók sem rafbók núna!

Rafbækurnar frá okkur getur þú hlaðið beint niður af síðunni okkar þegar þú kaupir bók.